تاجیکستان با درخواست افغانستان برای تحویل ۸۰ زندانی افغان موافقت کرد

رئیس‌جمهور تاجیکستان گفت که کار بند راغون در یک سال آینده تکمیل می‌شود و افغانستان از برق این بند بهره‌مند خواهد شد.
تاریخ انتشار : شنبه ۲۸ ثور ۱۳۹۸ ساعت ۱۲:۴۴
تاجیکستان با درخواست افغانستان برای تحویل ۸۰ زندانی افغان موافقت کرد
رئیس‌جمهور تاجیکستان می‌گوید به زودی ۸۰ نفر از زندانیان افغان را که در این کشور زندانی هستند، به افغانستان انتقال خواهند داد.
امامعلی رحمان این سخنان را در دیدار با صلاح‌الدین ربانی، سرپرست وزارت امور خارجه، مطرح کرده‌است.
وزارت امور خارجه اعلام کرد که درخواست استرداد ۸۰ زندانی افغانستان از تاجیکستان از سوی صلاح‌الدین ربانی، سرپرست این وزارت، مطرح و از سوی رئیس‌جمهور تاجیکستان پذیرفته شده‌است.
رحمان به سرپرست وزارت امور خارجه افغانستان اطمینان داده‌است که ۸۰ نفر از زندانیان افغان به زودی به افغانستان منتقل خواهند شد.
هرچند تاکنون روشن نیست که چه تعداد از شهروندان افغان در تاجیکستان زندانی‌اند، اما پیش از این نیز شماری از زندانیان افغان از تاجیکستان به افغانستان انتقال یافتند.
وزارت امور خارجه همچنین گفته‌است که دو طرف در این دیدار روی موضوعات امنیتی، اقتصادی و پروژه‌های توسعه ای بحث کرده‌اند.
بر اساس این گزارش، رئیس‌جمهور تاجیکستان همچنین در بخش همکاری‌های اقتصادی و پروژه‌های توسعه ای گفته‌است که کار بند راغون در یک سال آینده تکمیل می‌شود و افغانستان از برق این بند بهره‌مند خواهد شد.
بند راغون از پروژه‌های بزرگ اقتصادی تاجیکستان است. انتظار می‌رود تاجیکستان از این نیروگاه برق آبی، به افغانستان و پاکستان برق صادر کند.
کد مطلب: 90070
 


 
نام و نام خانوادگی
ایمیل